And mould'ring now in silent dust,
That heart that lo'ed me dearly!
But still within my bosom's core
Shall live my Highland Mary.

AULD LANG SYNE.

SHOULD auld acquaintance be forgot,
And never brought to min'?
Should auld acquaintance be forgot,
And days o' lang syne?

CHORUS.

For auld lang syne, my dear,

For auld lang syne,

We'll tak a cup o' kindness yet,
For auld lang syne.

We twa hae run about the braes,
And pu'd the gowans fine;
But we've wander'd mony a weary foot

Sin auld lang syne.

For auld, &c.

We twa hae paidľ't i' the burn,

From mornin sun till dine ;

But seas between us braid hae roar'd

Sin auld lang syne.

For auld, &c.

And here's a hand, my trusty fiere,

And gie's a hand o' thine;

And we'll tak a right guid willie-waught,

For auld lang syne.

For auld, &c.

And surely ye'll be your pint-stowp,

And surely I'll be mine;

And we'll tak a cup o' kindness yet
For auld lang syne.

For auld, &c,

BANNOCKBURN.

ROBERT BRUCE'S ADDRESS TO HIS ARMY.

TUNE-HEY TUTTIE TATTIE.'

SCOTS, wha hae wi' Wallace bled,
Scots, wham Bruce has aften led;
Welcome to your gory bed,

Or to glorious victorie.

Now's the day, and now's the hour;
See the front o' battle lower;

See approach proud Edward's power-
Edward! chains and slaverie !

Wha will be a traitor knave?
Wha can fill a coward's grave?
Wha sae base as be a slave?

Traitor coward! turn and flee!

Wha for Scotland's King and law
Freedom's sword will strongly draw,
Free-man stand, or free-man fa'?
Caledonian! on wi' me!

By oppression's woes and pains!
By your sons in servile chains!
We will drain our dearest veins,

But they shall they shall be free!

Lay the proud usurpers low!
Tyrants fall in every foe!
Liberty's in every blow!
Forward! let us do, or die!

THE GALLANT WEAVER

TUNE 'THE AULD WIFE AYONT THE FIRE.
WHERE Cart rins rowin to the sea,
By monie a flow'r and spreading tree,
There lives a lad, the lad for me,
He is a gallant weaver.

Oh I had wooers aught or nine,
They gied me rings and ribbons fine;
And I was fear'd my heart would tine,
And I gied it to the weaver,

My daddie sign'd my tocher-band,
To gie the lad that has the land;
But to my heart I'll add my hand,
And gie it to the weaver.

While birds rejoice in leafy bowers;

While bees rejoice in opening flowers;

While corn grows green in simmer showers, I'll love my gallant weaver.

SONG.

ANNA, thy charms my bosom fire,
And waste my soul with care;
But ah! how bootless to admire,
When fated to despair!

Yet in thy presence, lovely fair,

To hope may be forgiven;
For sure, 'twere impious to despair
So much in sight in heaven.

FOR A' THAT AND A' THAT.

Is there, for honest poverty,

That hangs his head, and a' that?
The coward-slave, we pass him by,
We dare be poor for a' that!
For a' that, and a' that,

Our toils obscure, and a' that;
The rank is but the guinea stamp ;
The man's the gowd for a' that.

What tho' on hamely fare we dine,
Wear hodden-grey, and a' that;
Gie fools their silks, and knaves their wine,
A man's a man for a' that.

For a' that, and a' that,

Their tinsel show, and a' that ;
The honest man, tho' e'er sae poor,
Is King o' men for a' that.

Ye see yon birkie, ca'd a lord,

Wha struts, and stares, and a' that;
Tho' hundreds worship at his word,
He's but a coof for a' that:
For a' that, and a' that,

His riband, star, and a' that,
The man of independent mind,
He looks and laughs at a' that.

A prince can mak a belted knight,
A marquis, duke, and a' that;
But an honest man's aboon his might,
Guid faith he mauna
fa that!

For a' that, and a' that,

Their dignities, and a' that,

The pith o' sense, and pride o' worth,
Are higher rank than a' that.

Then let us pray that come it may,
As come it will for a' that;

That sense and worth, o'er a' the earth,
May bear the gree, and a' that.

For a' that, and a' that,

It's coming yet, for a' that,

That man to man, the warld o'er,
Shall brothers be for a' that.

DAINTIE DAVIE.

Now rosy May comes in wi' flowers,
To deck her gay, green spreading bowers ;
And now comes in my happy hours,
To wander wi' my Davie.

CHORUS.

Meet me on the warlock knowe,
Dainty Davie, dainty Davie,
There I'll spend the day wi' you,
My ain dear dainty Davie.