FASTI ABERDONENSES. Prima Erectio Universitatis. 1. ALEXANDER Episcopus Servus Servorum Dei ad perpetuam rei memoriam. Inter ceteras felicitates quas mortalis homo in hac labili vita ex dono Dei nancisci potest ea non in ultimis computari meretur quod per assiduum studium adipisci valeat scientie margaritam, que bene beateque vivendi viam prebet ac peritum sua pretiositate longe excellere facit imperitum et ad mundi archana cognoscenda dilucide inducit suffragatur indoctis et infimo loco natos erigit in sublimes. Et propterea sedes apostolica rerum spiritualium et temporalium provida ministratrix et cujusvis laudabilis exercitii perpetua et constans adjutrix ut eo facilius homines ad tam excelsum humane conditionis fastigium acquirendum et acquisitum in alios transfundendum semper cum augmento quesiti facilius inducantur cum aliarum rerum distributio massam minuat scientie vero communicatio quanto in plures diffunditur tanto magis augeatur et crescat illos hortatur eis loca preparat et oportuna commoditatis auxilia impartitur Catholicorum Principum votis favorabiliter annuendo prout locorum et personarum exposcit utilitas et id conspicit in Domino salubriter expedire Sane pro parte carissimi in Christo filii nostri Jacobi Scotorum Regis illustris nobis nuper exhibita petitio continebat quod ipse Jacobus Rex Regni sui in quo due metropolitane et quamplures alie cathedrales ecclesie et insignes civitates et totidem dioceses ab invicem distincte necnon diversa notabilia monasteria prioratus praepositure ac beneficia ecclesiastica cum cura et sine cura secularia et diversorum ordinum regularia copiosissimusque tam ecclesiasti corum regularium et secularium quam laicalium Nobilium et plebearum personarum numerus consistunt ac populi ipsius Regni statum prosperari desiderans ac considerans quod in partibus Borealibus seu Aquilonalibus dicti regni sunt aliqua loca ab aliis partibus ipsius Regni per maris bracchia et montes altissimos distantia in quibus habitant homines rudes et litterarum ignari et fere indomiti qui propter nimiam distantiam a locis in quibus vigent Studia generalia et periculosum ad loca hujusmodi transitum studiis litterarum vacare non possunt quinimo litterarum earundem adeo sunt ignari ut nedum ad verbum Dei populis illarum partium predicandum sed etiam sacramenta ecclesiastica ministrandum viri ydonei non reperiantur: quodque si in inclita civitate veteri Aberdonensi que locis predictis satis vicina est vigeret generale Studium litterarum in qualibet licita facultate quamplures homines ipsius regni et precipue partium illarum tam ecclesiastici quam laici litterarum studio hujusmodi libenter intenderent et scientie margaritam pretiosissimam acquirerent ignari scientes et rudes eruditi efficerentur ac nedum reipublice dicti Regni utilitati sed etiam animarum saluti quamplurimum consuleretur prefatique populi rudes et ignari per alios qui litterarum studiis hujusmodi intenderent in vita et moribus honestis instruerentur: et propterea prefatus Jacobus Rex summopere cupit in prefata Civitate veteri Aberdonensi que insulis borealibus et montibus predictis ut prefertur satis vicina est et in qua aeris viget temperies ac victualium ubertas habitationum commoditas ceterarumque rerum ad usum vite humane pertinentium copia repperitur erigi et ordinari Studium generale in qualibet licita facultate Quare Rex ipse qui et ejus progenitores Scotorum Reges qui hactenus fuerunt Romane ecclesie et sedi apostolice constantissimi et sine aliqua varietate filii obedientes fuerunt ut hujus honestissimi voti sui compos fiat prefatumque Regnum scientiarum ornetur muneribus ita ut viros producat consilii maturitate conspicuos virtutum redimitos ornatibus ac diversarum facultatum dogmatibus eruditos sitque ibi fons irriguus de cujus plenitudine hauriant universi Christi fideles undecunque illuc affluentes et litteris virtutibusque ornari volentes: nobis humiliter supplicari fecit ut ad divini nominis laudem Catholice fidei exaltationem et animarum salutem ac rei publice partium illarum commodum et profectum quod in dicta Civitate Veteri Aberdonensi de cetero sit et perpetuis futuris temporibus vigeat Studium generale et Universitas existat studii generalis tam in Theologia ac iure Canonico et Civili necnon Medicina et Artibus liberalibus quam quavis alia licita facultate in quibus sicut in Parisiensi et Bononiensi et quibusvis aliis |