I. COLLEGII REGII ABERDONENSIS LEGES VETERES DE NOVO PROMULGATAE ANNO 1641. T QUICUNQUE ad philosophiae studium in collegium regale Aberdonense recipientur intra duos plus minus menses nomina dent, et in collegii matriculam per apparitorem inscribantur: inscripti haec [sancte] polliceantur, collegii legibus fideliter se obtemperaturos, praeceptoribus debitam reverentiam et obedientiam exhibituros, collegii commoda in iis quae salva pietate et officio possunt pro virili procuraturos, et ad quemcunque devenerint vitae statum, nunquam illi licite agenti adversaturos. Formula jurisjurandi. Ego A. B. collegio regio Aberdonensi nomen me dare profiteor, meque honestis et salubribus ejus legibus sedulo et fideliter obtemperaturum, commoda ejusdem in quibus salva pietate et officio licet, pro virili procuraturum, nunquam denique illi licite agenti adversaturum sed obnixe fauturum quantum tenuitatem meam divina gratia juvet sancte promitto, spondeo, stipulor. [Ego A. B. collegio regio Aberdonensi nomen me dare profiteor, sicque divinum numen mihi propitium opto, ut ego honestis ejusdem legibus obtemperaturum praeceptoribus ejusdem debitam reverentiam et obedientiam exhibiturum ejusque commodis in quibus licet obnixe fauturum me sancte coram Deo polliceor, promitto juro et spondeo, Deumque ultorem si sciens et volens fefellero non recuso .] Ubi sic nomina dederint, matriculaeque fuerint inscripti, unusquisque apparitori sex solidos Scoticos minimum persolvito. Primarius studiorum finis esse debet [pura] religio Dei optimi maximi divinorumque operum et beneficiorum cognitio. Haec cognitio doctrina. traditur, morum probitate comprobatur et fovetur. Nequis ergo in praeceptorum, alumnorum, aut studiosorum, collegii numerum recipiatur, qui non puram religionem juxta nunc receptam in regno formulam [morem] profiteatur et approbet . Diebus dominicis concionibus sacrisque congressibus omnes citra discrimen [togati et modeste] intersint: qui abfuerit discipulorum, poenas, nisi excusationem attulerit, pro ratione delicti, luito: praeceptorum qui abfuerit mulctam pecuniariam luito [et quicunque pileo indutus ceruleo deprehensus sit, pro primo, sex solidos soluito, pro secundo, pileum amittito aut poenas dato .] Aliis diebus, precibus matutinis vespertinisque omnes intersunto: qui secus fecerit, eandem poenam quam a sacris concionibus absentes incurrat Alumnorum sive pauperum studentium singuli ex arbitrio primarii ordine suo Deum oranto, claraque voce preces fundunto. Ad preces discipuli summa cum modestia [cum luminibus hyeme] accedunto: psalmorum aut bibliorum libros aliquos ad conciones sacras precesque adferunto . A quotidianis gratiarum actionibus lectioneque sacra bibliorum nemo abesto. Ad collegium nemo admittitor nemo retinetor, in quo non sit verecundiae et diligentiae indicium. Quicunque aliquod damnum collegio dederit, bona ratione punitor; damnum quoque praestato. [Quicunque damnum aliquod collegio dederit, nomen suum vel alterius parieti, scamno, mensae, vel cuiuis alteri loco inscripserit, vel plumbum tecti dissecuerit etc. publice poenas luito; damnum quoque ex arbitrio primariï et regentium reparato .] In lectionibus et disputationibus cum publicis tum privatis singuli frequentes sunto [adsunto]; absentes a praeceptoribus castigantor. Non tantum singuli suis, sed omnes omnibus praeceptoribus debitam reverentiam et obedientiam exhibento, et in rebus omnibus licitis obtemperanto. Sermo omnium ubique Latinus [Hebraeus] aut Graecus esto. In scholas singuli suas ad tintinnabuli sonitum summa cum modestia con |